Францішканскі Ордэн Свецкіх

Дэлегатура імя благаслаўлёных Ахілеса і Германа Ордэну Братоў Меншых Канвентуальных у Беларусі

info.francishkanie@gmail.com

У часы святога Францішка ўзнікла неабходнасць вяртання да глыбіні хрысціянства. Касцёл быў засяроджаны на побытавых праблемах, вера стала павярхоўнай, любоў - тлеючай, пабожнасць - скрыўленай, а звычаі ды норавы - сапсаваныя . З'яўляліся вандроўныя прапаведнікі, якія, распаўсюджваючы сярод гараджан ідэю адмовіцца ад матэрыяльных дабротаў і патрабуючы ад духавенства радыкальнай апостальскай беднасці, прызывалі веруючых да навяртання. Гэты ерэтыцкі рух знаходзіў водгук у сэрцах людзей.

У 1209 годзе Папа Інакенці ІІІ, дзеля вяртання ерэтыкоў да еднасці з Касцёлам, дазволіў Францішку прапаведваць і зацвердзіў яго незвычайна простую Рэгулу (Правіла жыцця). Вынікам гэтых казанняў стала жаданне шматлікіх гараджан Асізі звярнуцца ў пошуках Бога на шлях навяртання. Францішканскі стыль жыцця быў прыняты таксама і жыхарамі горада Грэчча. Да гэтых людзей Францішак напісаў свой "Ліст да ўсіх вернікаў", які лічыцца першапачаткам Правіла жыцця Францішканскага Ордэну Свецкіх.

Першая Рэгула, або, дакладней, "Memoriale Fratrum et Sororum de Poenitentia" - "Заахвочванне для Братоў і Сясцёр Пакаяння" - была ў 1221 годзе адрасавана ўсім пакутнікам - як францішканскім, так і нефранцішканскім. Аднак у 1229 годзе яна была зменена і пацверджана Папам Грыгорыем ІХ, вялікім сябрам св. Францішка.

Нягледзячы на некаторыя заканадаучыя нясцісласці, першая Рэгула напрацягу 68 год служыла арыенцірам для свецкіх вернікаў, якія імкнуліся да жыцця паводле Евангелля. Папа Мікалай ІV, францішканін, абвесціў Рэгулу, якая адносілася да францішканскіх супольнасцяў вернікаў. Гэта Рэгула, што складалася з 20 раздзелаў, дзейнічала фактычна напрацягу шасцісот гадоў, аж да пантыфікату Льва ХІІІ. Напрацягу гэтага часу ў яе ўносілі толькі нязначныя змены.

У Рэгуле Мікалая ІV 1289 года францішканскі рух свецкіх атрымаў назву Трэцяга Ордэну св. Францішка.

Папа Леў ХІІІ бачыў у Трэцім Ордэне добрую глебу для развіцця хрысціянскага жыцця і, абвясціўшы ў 1883 годзе простую і кароткую ( у параўнанні з мінулай) Рэгулу, заклікаў вернікаў да стварэння супольнасцяў тэрцыярыяў.

Падчас духоўнай адновы пасля Другога Ватыканскага Сабору і ў выніку адзінаццацігадовай працы міжнароднай камісіі з'явілася абноўленая Рэгула, якую Павел VI зацвердзіў 24 чэрвеня 1978 года буллай "Серафіцкі патрыярх". Другая назва Трэцяга Ордэну - Францішканскі Ордэн Свецкіх (ФОС).

Ва ўсіх гэтых рэгулах захавалася галоўнае: дух беднасці, навяртання, супакою, любові, паслухмянасці Касцёлу, цвёрды намер уцелавіць ідэалы поўнага і сталага хрысціянства.

Францішканскі Ордэн Свецкіх - гэта аўтаномная супольнасць, колькасцю 1,5 мільёны чалавек, якая мае ўласнае кіраўніцтва на розных узроўнях і супрацоўнічае з рознымі галінамі францішканскай сям'і.